ياللى الهوا فيكى .. نوع القصيدة : عامية

ياللى الهوا فيكى
  حس الهوا فيا
والتايهة فى عنيكى
بلقاها فى عنيا
لو قلت أهديكى
عمرى أنا شوية
لو عشته علشانك
طاير فى أغصانك
بلسم لاحزانك
غنوة على هدية
ولا عمرى هوفيكى 
صبرك على غلبى
على وقفتك جنبى
والحالة مش هيا
وبغيب كتير وانسى
شط الهموم مَرسَى
فارجع ألاقيكى
صاينة الهوا فيكى
وتاخدنى أحضانك
تسقينى حنية
ياللى الهوا فيكى
عشق الهوا فيا

كان زمان ..لما كنا صغيرين :نوع القصيدة :عامية

كان زمان
لما كنا صغيرين
والقلب صافى وضحكته تملى السنين
وعنينا تلمع لما تلمح لعبة حلوة
وساعات تعيط :لومشيت ومخدتنيش
كان حلم شكله ميتوصفش
كان عمر تانى ميتحكيش
كان همى واجب مدرسة مبحلهوش
كان دمعى بوسة على الخدود متخليهوش
يازمان اوام عدى من غير مايستاذن
انا ليا عمر فى دفترك .... متضيعوش 

الدايم الله ياشيخ امين :نوع القصيدة :عامية

الدايم الله ياشيخ امين
عاللى ماتو وعاللى لسا
عالى راح مـ العمر خلسة
وعاللى عايشين ميتين

الدايم الله ياشيخ امين
عالشباب فى بلدنا فلصو
والرجال فى بلدنا خلصو
والجماعة الطيبين

الدايم الله ياشيخ امين
عالجوامع والشوارع
عاللى نازل واللى طالع
واللى من اهل اليمين

الدايم الله ياشيخ امين
عالقلوب الصافية جنة
عالنفوس المطمئنة
عاللى راحو من سنين

عايز اقولك شد حيلك
مش هيرجع تانى جيلك
قطر عدى وحان رحيلك
قول يارب ..وقول امين

ومين عارف ومين يدرى:نوع القصيدة :عامية

                                                                           ومين عارف ومين يدرى
                                                                               ومين يضمن لنا بكرة
                                                                            فى ارض الذل والحرمان
                                                                         وفين بيتنا اللى كان مليان
                                                                                   وفين الخير 
                                                                          وفين مصر اللى فيها كتير 
                                                                             وفين يازمان؟؟؟
                                                                      وفين عشقى اللى داب فيها
                                                                              ودم القلب اللى يفديها
                                                                                   ما دمنا هان
                                                                        وفين جيشنا اللى كان جبار
                                                                            يخوض الحرب وسط النار
                                                                             وشايل موته فى ضلوعه
                                                                             يجيب الاقصى فـ رجوعه
                                                                                    ولا نخضع ولا نتهان
                                                                                  وفين الحب والرحمة
                                                                        وفين الضحكة فى الزحمة؟؟
                                                                           وفين القلب الحليب صافى
                                                                                   برغم الهم فـ اكتافى
                                                                                          لكن فرحان
                                                                دانا اصلى عشقت الشعر من همك
                                                                                  وسطرت العذاب الحان
                                                                                 لا دى مصر اللى ولدتنا
                                                                                        ولا سكنى ولا بيتنا
                                                                               برغم وجودى فـ خريطتك
                                                                                  بدور لسا عالعنوان

الله الدايم ..الله الباقى :نوع القصيدة :عامية

الله الدايم ....الله الباقى
بعد مايمشو البنى آدمين
دنيا تفرق ....دنيا تلاقى
حكمة وسارية ليوم الدين
والاعمار بتعدى فى سهوة
سنة ورا سنة تلقاها سنين
تفضل تجرى وجواك نارك
واما يدوب يخلص مشوارك
تلقاك داخل فى الستين
واللى بيندم على مشواره
واللى يبص لعمره فى حسرة
واللى يقول دا فاضلى يومين
والحسبة مش زى ماقالو
يبقا الشاب واقف على حاله
يطلع سره فى غمضة عين
روق بالك ....صفى النية
اعمار محسوبة ومنهية
مش بالغنى هيزيد العمر
ولا بالفقر هتنقص ثانية
الله الدايم.... الله الباقى
بعد ماتفنى تلك الدنيا

الغربة :نوع القصدة :عامية

الغربة دى مرة
واللى يعيش هيشوف
اضمن تكون راجل
هتعيش فى وسط الوف
واللى معاه ربه
عمره ماحس بخوف
سيبك من الاحزان
عمرك ياخى واحد
واياك تشيل قدرة
عايزة كمان واحد
خر الجبل مهدود
لما سابوه بالهم
وانت يدوب انسان
مخلوق بلحم ودم
ازاى تسيب قلبك
غرقان فى بحر هموم
لو حتى كان ذنبك
لو لامو فيك اللوم
اسجد وقوله يارب
باب الكريم مفتوح
وان ضاق فى يوم صدرك
افتح كتاب الله
وان جه فى يوم كرمك
ابكى كمان واقراه
ربك كريم دايما
هو الكرم ...معناه
رزق الطيور فى السما
رزق الكفيف بعماه
حتى الجنين فى الرحم
عمره فى يوم مانساه
حتى اللى عابد غيره
من وسع كرمه عطاه
ازاى يسيب واحد
صلى وقال الله 

ذكرينى

                                                                 ذكرينى.....

                                                                                              ذكرينى يالامانى التائهات     
                                                                                 ذكرينى وامكثى فى الذكريات
                                                                                     
                                                                                            ذكرى القلب النسى بعهده    
                                                                                 ماعاد يجدى فان العهد فات

                                                                                        كم كرهنا فى الغروب سحابةً
                                                                                كانت تمثل حبنا عند الممات

                                                                                        ولكم قضينا فى الربيع سعادةً
                                                                                باتت تلملم جرحها بالناعيات

                                                                                               ذكرينى بالنهار وكيف كنا 
                                                                                ذكرينى بالليالى الفاتنات

                                                                                          ذكرينى بسمةً كانت عليكى
                                                                               كانت تصبرنى ثقيل النائبات

                                                                                          ذكرينى وارجعى عمرا جميلا
                                                                               لا تخبرينى بان العمر مات

                                                                                           انى ظمئت الحب بعد فراقنا
                                                                                ولقد قضينا حبنا نهرا فرات

                                                                                            انا ماطلبت بان يعود فقيدنا
                                                                               لكنها ذكرى كباقى الذكريات